নৱবাৰ্তা গুৱাহাটী :: পঞ্জাব নেচনেল বেংকৰ (পি এন বি) গুৱাহাটী মণ্ডল কাৰ্যালয়ে আজি গুৱাহাটীৰ নৰ্থ ইষ্টাৰ্ণ ডেভেলপমেণ্ট ফাইনেন্স কৰ্পৰেচন (NEDFi)-ত এক মেগা এম এছ এম ই আৰু খুচুৰা ঋণ গ্ৰাহক সংযোগ অভিযানৰ আয়োজন কৰে।
অনুষ্ঠানটোত পি এন বি গুৱাহাটী মণ্ডল কাৰ্যালয়ৰ মণ্ডল মুৰব্বী আৰু জ্যেষ্ঠ বিষয়াসকলে উপস্থিত থাকি অনুষ্ঠানটি গৰিমামণ্ডিত কৰে। উপ-মণ্ডল মুৰব্বী মন্দাক্ৰান্তা বিশ্বাসৰ আদৰণি ভাষণেৰে অনুষ্ঠানৰ শুভাৰম্ভ হয়।
গুৱাহাটীৰ ব্যৱসায়িক সম্প্ৰদায়ৰ সৈতে জড়িত উদ্যোগী আৰু অংশীদাৰসকলে এই অভিযানত উৎসাহেৰে অংশগ্ৰহণ কৰে। ইয়াৰ জৰিয়তে অসমত এম এছ এম ই আৰু খুচুৰা ঋণ খণ্ডৰ ক্ৰমবৰ্ধমান গতি আৰু অপাৰ সম্ভাৱনাৰ প্ৰতিফলন ঘটে।
অনুষ্ঠানৰ সময়ছোৱাত কুৰ্মিষ্ঠা ভৰালীয়ে বেংকৰ বিভিন্ন খুচুৰা বেংকিং সামগ্ৰীৰ বিষয়ে ব্যাখ্যা কৰে। আনহাতে, শ্যামলীমা ভূঞাই গ্ৰাহকসকলক বেংকৰ দ্বাৰা আগবঢ়োৱা বিভিন্ন এম এছ এম ই-সম্পৰ্কীয় সামগ্ৰী আৰু আঁচনিৰ বিষয়ে বিতং তথ্য প্ৰদান কৰে।
গুৱাহাটীৰ মণ্ডল মুৰব্বী শিৱেশ শুক্লাই বেংকৰ বিভিন্ন ডিজিটেল ঋণ প্ৰদানৰ পদক্ষেপসমূহৰ বিষয়ে আলোকপাত কৰি কয় যে পি এন বিয়ে প্ৰক্ৰিয়াসমূহ সৰল কৰা, দ্ৰুত ঋণ অনুমোদন নিশ্চিত কৰা আৰু এম এছ এম ই তথা খুচুৰা ঋণ গ্ৰাহকসকলক কোনো ধৰণৰ অসুবিধা নোহোৱাকৈ সহজ আৰু সুবিধাজনক ঋণ সুবিধা প্ৰদান কৰাৰ দিশত নিৰন্তৰ প্ৰচেষ্টা চলাই আহিছে। গ্ৰাহকৰ মতামতৰ বিষয়ে উল্লেখ কৰি তেওঁ কয় যে পি এন বিৰ প্ৰতিগৰাকী গ্ৰাহকৰ মতামত অতি মূল্যৱান, কিয়নো এই মতামতে বেংকক সেৱাৰ ক্ষেত্ৰত নিৰন্তৰ উন্নতি সাধন কৰাৰ লগতে নতুন আৰু উদ্ভাৱনীমূলক ব্যৱস্থা গ্ৰহণ কৰাত সহায় কৰে।
অভিযানৰ সময়ছোৱাত মণ্ডল মুৰব্বীয়ে গ্ৰাহকসকলৰ হাতত ঋণ অনুমোদন পত্ৰ প্ৰদান কৰে আৰু তেওঁলোকক আশ্বাস দিয়ে যে পি এন বিয়ে তেওঁলোকৰ ব্যৱসায়ৰ বিকাশত সহায় আৰু সহযোগিতা আগবঢ়োৱাৰ বাবে ভৱিষ্যতেও সকলো সম্ভৱ প্ৰচেষ্টা অব্যাহত ৰাখিব।
উপ-মণ্ডল মুৰব্বী জয় কৃষ্ণ প্ৰধানৰ ভাষণেৰে অনুষ্ঠানৰ সামৰণি পৰে। এই অনুষ্ঠানৰ জৰিয়তে পঞ্জাব নেচনেল বেংকৰ এম এছ এম ই আৰু খুচুৰা ঋণ খণ্ডক শক্তিশালী কৰাৰ লগতে উত্তৰ-পূৰ্বাঞ্চলৰ অৰ্থনৈতিক বিকাশত গুৰুত্বপূৰ্ণ অৱদান আগবঢ়োৱাৰ প্ৰতি থকা প্ৰতিশ্ৰুতি পুনৰ দৃঢ় হয়।