আৰ আৰ দলৰ দৰ্শন ৰিয়ানে মোকতকৈ বেচি জানে ঃ নীতিশ ৰাণা
নৱবার্তা নতুন দিল্লী, ঃ ৰাজস্থান ৰয়েলছে চলিত ইণ্ডিয়ান প্ৰিমিয়াৰ লীগ [আই পি এল]ৰ প্ৰথম ছয়খন মেচৰ চাৰিখনতে পৰাজয়ৰ সন্মুখীন হৈ স্বাভাবিকতে চাপৰ সন্মুখীন হৈছে৷ বুধবাৰে দলে নিজৰ সপ্তম লীগ মেচত দিল্লী কেপিটেলছৰ মুখামুখি হ’ব৷ এই মেচখন নিশা ৭ .৩০ বজাত নতুন দিল্লীৰ অৰুন জেটলি ষ্টেডিয়ামত অনুষ্ঠিত হ’ব৷
উল্লেখ্য যে দিল্লী কেপিটেলছ দলে এইবাৰ চমকপ্ৰদ আৰম্ভনি কৰি প্ৰথম চাৰিখন মেচত ক্ৰমাগত বিজয় অৰ্জন কৰিছে৷ যোৱা মেচত দলটো প্ৰথম পৰাজয়ৰ সন্মুখীন হয় যদিও পুনৰ গৃহ ষ্টেডিয়ামত খেলা বিষয়টোৱে দিল্লীক সহায় কৰাৰ বিপৰীতে ৰাজস্থান ৰয়েলছলৈ প্ৰত্যাহ্বান লৈ আনিছে৷ অৱশ্যে ৰয়েলছে চাপমুক্ত হৈ ইতিবাচক মানসিকতাৰে মেচখন খেলিবলৈ সাজু বুলি ব্যক্ত কৰে দলৰ নিৰ্ভৰযোগ্য বেটাৰ নীতিশ ৰাণাই৷
‘আই পি এলৰ দৰে বিশ্বৰ এখন শ্ৰেষ্ঠ ক্ৰিকেট লীগৰ প্ৰতিখন মেচতে চাপ থাকে৷ আনহাতে, পেছাদাৰী ক্ৰিকেটাৰে চাপ নিয়ন্ত্ৰণ কৰি প্ৰদৰ্শন কৰাটোৱে মুল কথা৷ এইসময়ত আমি প্ৰত্যাশিত ফলাফল পোৱা নাই৷ কিন্তু প্ৰতিখন মেচতে দলৰ বহু ইতিবাচক দিশো আছে৷ সেইখিনিকে সমলৰূপে লৈ আমি দৃঢ়তাৰে খেলিবলৈ সাজু হৈছো৷’ সংবাদমেলত ৰাণাই ব্যক্ত কৰে৷
উল্লেখ্য যে ৰাজস্থান চাৰি পইণ্টৰে তালিকাৰ অষ্টম স্থানত থকাৰ বিপৰীতে দিল্লীয়ে আঠ পইণ্টৰে দ্বিতীয় স্থানত আছে৷ ৰয়েলছৰ বেটাৰৰ প্ৰদৰ্শনৰ ধাৰাবাহিকতা নথকা প্ৰশ্নৰ উত্তৰ দি ৰাণাই কয় ‘দলৰ সফলতাই এনেবোৰ বিষয় মুকলি নকৰে৷ আমি জয় হোৱা মেচত ব্যক্তিগত প্ৰদৰ্শন চোৱা নাই৷ দলৰ সফলতাহে চাইছো৷ প্ৰতিখন মেচৰ পৰিস্থিতিয়ে খেলুৱৈৰ পৃথক প্ৰদৰ্শন নিৰ্ণয় কৰে৷’
ইফালে, কে কে আৰ দলক নেতৃত্ব দিয়া তথা বলিং কৰাৰ অভিজ্ঞতা থকাৰ পাছতো ৰয়েলছত এই ভূমিকা কিয় লোৱা নাই বুলি প্ৰশ্ন কৰাত নীতিশে কয় ‘কে কে আৰত মই সাত বছৰ খেলিছিলো৷ কিন্তু ৰাজস্থান ৰয়েলছত নতুন৷ আৰ আৰ দলৰ দৰ্শন মোতকৈ বেছি ৰিয়ানে জানে৷ সেয়ে টীম মেনেজমেণ্টে সঠিক সিদ্ধান্তই লৈছে৷ আনহাতে, যি উইকেটত মোৰ বলিং দলক সহায় কৰিব বুলি মই জ্ঞাত হ’ম তেতিয়া অধিনায়ক সঞ্জুক নিজেই ব্যক্ত কৰিম৷ আচলতে দল গঠনৰ সময়তে কাৰ কি ভূমিকা হ’ব সেয়া টীম মেনেজমেণ্টে নিশ্চিত কৰি লয়৷’