মহাবল চিমেণ্টৰ সৈতে সংযোগ অস্বীকাৰ আদানী গ্ৰুপৰ; অসমত আদানী গ্ৰুপৰ বাবে ভূমি আবণ্টনৰ দাবী “ভিত্তিহীন”

নৱবার্তা গুৱাহাটী: অসম চৰকাৰে ডিমা হাচাও জিলাত ৩,০০০ বিঘা মাটি আবণ্টন দিয়া বুলি দাবী কৰি প্ৰচাৰিত বাতৰিৰ বিৰুদ্ধে সোমবাৰে আদানী গ্ৰুপে সম্পূৰ্ণৰূপে অস্বীকাৰ কৰিছে।
আহমেদাবাদৰ পৰা সংবাদ মাধ্যমৰ বিবৃতিত আদানী গ্ৰুপে স্পষ্ট কৰি দিয়ে যে মহাবল চিমেণ্টৰ সৈতে আদানী গ্ৰুপৰ কোনো মালিকীস্বত্ব, সংযোগ বা সম্পৰ্ক নাই। সংবাদ মাধ্যম আৰু সামাজিক মাধ্যম ব্যৱহাৰকাৰীসকলক তথ্য ভাগ-বতৰা কৰাৰ পূৰ্বে তথ্য পৰীক্ষা কৰিবলৈ আহ্বান জনাই মুখপাত্ৰগৰাকীয়ে কয় যে, ‘এই প্ৰতিবেদন আৰু উল্লেখিত তথ্যসমূহ ভিত্তিহীন, মিছা আৰু বিভ্ৰান্তিকৰ। আদানি নামটো মহাবল চিমেণ্টৰ সৈতে সংযোগ কৰাটো বিভ্ৰান্তিকৰ।
বিবৃতিটো পঢ়ক :
“এইটো আমাৰ দৃষ্টিগোচৰ হৈছে যে আদালতৰ শুনানিৰ আঁত ধৰি কিছুমান বাতৰি, সামাজিক মাধ্যম পোষ্ট আৰু ক্লিপ প্ৰচাৰ বা ভাইৰেল হৈছে, য’ত দাবী কৰা হৈছে যে অসম চৰকাৰে ডিমা হাচাওত ৩,০০০ বিঘা ভূমি আদানী গ্ৰুপক চিমেণ্ট প্ৰকল্প স্থাপনৰ বাবে আবণ্টন কৰিছে।
আমি স্পষ্টভাৱে উল্লেখ কৰোঁ যে এই প্ৰতিবেদন আৰু উল্লেখিত বাতৰিসমূহ ভিত্তিহীন, ভুৱা আৰু বিভ্রান্তিমূলক। আদানী নামটো মহাবল চিমেণ্টৰ সৈতে সংযোগ কৰাটো দুৰ্ভাগ্যজনক। মহাবল চিমেণ্টৰ সৈতে আদানী গ্ৰুপ কোনো ধৰণে সম্পৰ্কিত, মালিকানাধীন বা জড়িত নহয়।
আমি সংবাদ মাধ্যম, ডিজিটেল প্লেটফৰ্ম আৰু জনসাধাৰণক এনে দাবী বা শ্বেয়াৰ কৰাৰ পূৰ্বে তথ্যসমূহ পৰীক্ষা কৰিবলৈ দৃঢ়তাৰে আহ্বান জনাইছো। অপ্ৰমাণিত আৰু বিভ্রান্তিমূলক সমলৰ প্ৰচাৰে কেৱল জনসাধাৰণক ভুল তথ্য প্ৰদান কৰাই নহয় বৰঞ্চ অনৰ্থক বিভ্ৰান্তিৰো সৃষ্টি কৰে। “
এই স্পষ্টীকৰণে সমগ্ৰ অসমত বিনিয়োগকাৰীৰ আৱেগ সুস্থিৰ কৰি তুলিব বুলি আশা কৰা হৈছে, কিয়নো পূৰ্বৰ জল্পনা-কল্পনাই স্থানীয় ৰিয়েল এষ্টেট আৰু উদ্যোগ খণ্ডত অনিশ্চয়তাৰ দিশে ইন্ধন যোগাইছিল। বিশ্লেষকসকলে মত প্ৰকাশ কৰিছে যে আদানী গ্ৰুপৰ জড়িত নথকাটো আনুষ্ঠানিকভাৱে নিশ্চিত কৰাৰ পিছত গুৱাহাটীৰ চিমেণ্ট আৰু নিৰ্মাণ সামগ্ৰীৰ বজাৰসমূহত অধিক স্থিৰ কাৰ্য-কলাপ লক্ষ্য কৰিব পাৰে।