চাৰিদিনীয়া কৰ্মশালাৰে অসমৰ বনকৰ্মীক আধুনিক প্ৰযুক্তিৰে পৰিৱেশ সংৰক্ষণৰ প্ৰশিক্ষণ প্ৰদান
নৱবার্তা গুৱাহাটী ঃ অসম চৰকাৰৰ পৰিৱেশ, বন আৰু জলবায়ু পৰিৱৰ্তন বিভাগৰ অধীনস্থ জালুকবাৰীস্থিত অসম বন বিদ্যালয়ৰ সহযোগত বালিপাৰা ফাউণ্ডেচনে আয়োজন কৰা ‘ফিল্ড টু মেপ’ শীৰ্ষক চাৰিদিনীয়া কৰ্মশালাখনিৰ সফল সামৰণি পৰিছে৷ যোৱা ২৭ আগষ্টৰ পৰা ৩০ আগষ্টলৈ অনুষ্ঠিত হোৱা এই কৰ্মশালাত জিপিএছ, জিআইএছ আৰু স্পেচিয়েল ডাটা এনালাইছিছৰ সহায়ত বাস্তৱিক ব্যৱহাৰৰে বন সুৰক্ষা আৰু জৈৱ বৈচিত্ৰ নিৰীক্ষণৰ মেপিং প্ৰয়োগ বিষয়ত আধুনিক কাৰিকৰি ব্যৱস্থা প্ৰয়োগত আলোচনা কৰা হয়৷
কৰ্মশালাত ডিব্ৰু-ছৈখোৱা ৰাষ্ট্ৰীয় উদ্যান, ধনশিৰি বন সংমণ্ডল, হাইলাকান্দি ডুম ডুমা সংমণ্ডল আদিকে ধৰি সমগ্ৰ অসমৰ বনাঞ্চলত কাম কৰা ফ্ৰণ্টলাইন কৰ্মচাৰীসকলক একত্ৰিত কৰি এক সুসংবদ্ধ কাৰ্যসূচীৰে ব্যৱহাৰিক ক্ষেত্ৰ অনুশীলনৰ সৈতে ডিজিটেল প্ৰশিক্ষণৰ বিভিন্ন নতুন প্ৰযুক্তিৰ মিশ্ৰণৰে হাবিত কাম কৰাৰ বিষয়ে অনুশীলন প্ৰদান কৰা হয়৷ চাৰিদিনৰ এই কৰ্মশালাত অংশগ্ৰহণকাৰীসকলে তেওঁলোকৰ দৈনন্দিন বন সুৰক্ষা আৰু জৈৱ বৈচিত্ৰ নিৰীক্ষণ কৰ্তব্যৰ সৈতে ভূ-স্থানীয় প্ৰযুক্তিক কেনেকৈ একত্ৰিত কৰিব পাৰি সেই বিষয়ে শিক্ষা লাভ কৰে৷ তদুপৰি জিপিএছ ডিভাইচ আৰু জিঅ’-ক’অৰ্ডিনেটৰ মূল কথাবোৰ আয়ত্ত কৰাৰ পৰা আৰম্ভ কৰি ৱেপইণ্ট সংৰক্ষণ কৰা, ট্ৰেন্সেক্টৰ সীমা নিৰ্ধাৰণ আৰু এলেকা গণনা কৰালৈকে সকলো দিশ পুংখানুপুংশৰূপত আলোচনা কৰা হয়৷ এই কৰ্মশালাৰ প্ৰতিখন অধিবেশনতে নিখুঁত আৰু ফলপ্ৰসূ সংৰক্ষণৰ বাবে প্ৰযুক্তি ব্যৱহাৰ কৰাৰ ক্ষমতা গঢ়ি তোলাৰ দিশত গুৰুত্ব দিয়া হৈছিল৷
আনহাতে, এই কাৰ্যসূচীত তথ্য দৃশ্যমান কৰা, বহুভুজ সৃষ্টি কৰা, দূৰত্ব আৰু অঞ্চল গণনা কৰা তথা বাসস্থানৰ মানচিত্ৰ প্ৰস্তুত কৰাৰ বাবে গুগল আৰ্থৰ দৰে মুক্তভাৱে উপলব্ধ প্লেটফৰ্মৰ ব্যৱহাৰৰ ওপৰত গুৰুত্ব আৰোপ কৰা হৈছিল৷ গুগল আৰ্থ, মেপিলাৰী, নোট কেমেৰা আৰু জিপিএছ এচেন্সিয়েলছৰ দৰে মোবাইল ভিত্তিক এপ্লিকেচন প্ৰৱৰ্তন কৰা হৈছিল যাতে অংশগ্ৰহণকাৰীসকলক ক্ষেত্ৰত তথ্য ধৰি ৰখা, ছবি ৰেকৰ্ড কৰা আৰু বাস্তৱ সময়ত লেণ্ডস্কেপ দৃশ্যমান কৰাত সহায় কৰে৷ গ্ল’বেল ফৰেষ্ট ৱাচ প্লেটফৰ্মত এটা নিৰ্দিষ্ট অধিবেশনে অংশগ্ৰহণকাৰীসকলক জিপিএছ স্থানাংক বিচাৰি উলিয়াবলৈ প্ৰক্সিমিটি এলাৰ্মৰ ব্যৱহাৰকে ধৰি প্ৰায় বাস্তৱ সময়ৰ বন নিৰীক্ষণৰ বাবে সঁজুলিসমূহ অন্বেষণ কৰিবলৈ অনুমতি দিছিল৷ প্ৰশিক্ষণৰ চূড়ান্ত খণ্ডত অংশগ্ৰহণকাৰীসকলক মুক্ত উৎসৰ জিআইএছ চফটৱেৰ, কিউজিআইএছৰ সৈতে পৰিচয় কৰাই দিয়া হৈছিল, যাৰ ফলত তেওঁলোকে ভেক্টৰ ফাইল বিশ্লেষণ কৰিব পাৰে লগতে দীৰ্ঘম্যাদী বন ব্যৱস্থাপনা আৰু জৈৱ বৈচিত্ৰৰ কৌশল সমৰ্থন কৰিব পৰা সংহত মানচিত্ৰ তৈয়াৰ কৰিব পাৰে৷
কৰ্মশালাত ভাষণ দি অসম বন বিদ্যালয়ৰ সঞ্চালক আই এফ এছ ডিম্পী বৰাই এই কাৰ্যসূচীৰ ক্ৰমবৰ্ধমান চাহিদা আৰু প্ৰাসংগিকতাৰ ওপৰত আলোকপাত কৰি কয় যে, জিআইএছ আৰু জিপিএছৰ প্ৰশিক্ষণ ফ্ৰণ্টলাইন বন কৰ্মচাৰীসকলৰ বাবে দক্ষতাৰ অন্যতম আধাৰ৷ এই জ্ঞানক এনেদৰে ব্যৱহাৰিক কাৰ্যসূচীৰে হাতে কামে দেখুওৱা কৰ্মশালাৰ জৰিয়তে সুলভ কৰি তোলাটো উৎসাহজনক বিষয়৷ এই পদক্ষেপে বালিপাৰা ফাউণ্ডেশ্যনৰ প্ৰকৃতি সুৰক্ষাত ব্ৰতী থকা দৃষ্টিভংগীক প্ৰতিফলিত কৰে৷